IT TANAKVAGU MINANGAKAL DIT TUKUNG

Varo poh ka dot iso o tuturan dot it tanakvagu minangakal dit tukung. Na iti tuturan yadkiti, it tanakvagu dino ka banal ko ozi magasu. Ong kadung ko magasu nopo nga varo nopokah dot anu dau dot ongo dupot. Kadung okonko bakas na tambang, kalasiu, palanuk om nunu nopo. Na insan tadau, alaid yosido manau-panau sid govuton dot miovit-ovit dot dangol, bilok, barazit om it ongo asu tazam dau topot aso ih dot emot mitalib o nunu nopo dupot. Na amu po ompusan it tanak vagu kah gamko minamanau no banal yosido minsodu antad dit koubasan pogosuan dau dot mininsomok sid ponong dot vosoi. Na irit po minsosodop no, pagahung noko inot ongo tasu nau miuusig dit tambang banal ko agazo ka. It tanakvagu dino tokono no dau it tambang dinot bilok dau ka om pogigili po kah dinot tambang tu antad noko nolopuson inot tinanan dinot tambang om minatai no. giab-giabo noko kah dinot tanakvagu ka inot tambang dot banalko agazo. Na nasadapan ka it tanakvagu mongogiab dinot ongo tonsi om lunok dinot tambang nongoi dau om nopongo ogi. Na ino tu orondom no miniapui no ka yosido panganavau dit kondiri dau.

Irit po momosomok tumanga lolong tionging poka dinot song bahanan o tukung opodok agazo no. Varo no ka dinot ongo tukung tomiabal do lingkut om banal noko rumosi om notigagang inot tanakvagu. Na varo iso tukung tagazo antad dit ongo bahanan ka minomoros sid tanakvagu kau dau “Sira ka’adapan ong ikau dino Ambaza” ka dit tukung dino. Na pongitung noka it tanakvagu om boros dau “Aso kaadapan ku boh ong yoku diti tu ugungahan oku dinot vosoi murulun. Sukul ong kintoron ino vosoi murulun na kodop oku ogi ” ka dit tanak vagu. Na norongou poh ka dit ongo tukung ka, tumulud noka kah antad sino kah om minangakakat dit ongo kazu, vatu om nunu nopokah dot akakat dit ongo tukung. Na noingkod toduruk ka it vosoi molok-golok murulun om ka dit tukung tagazo ”Na kah imatai no ditokou nokodop no dati ilot riniba dilo” ka dit tukung tagazo om rikoto no kah dau it tanakvagu. Nokorikot po ka sid tanak vagu unggala no kah inot vozoon dot tukung banal ko agazo ”Nokodop kono kah dino ambaza” ka. Topot amu po nambat dit tanakvagu kah tiabpas po ka dit nitobon om niuntun dit ongo tukung. Na ambato no ka dit tanakvagu ”nunukah kadapan ku ong yadkiti kougangaubanal ilot vosoi murulun” ka dau. Na tumulud vagu ka it ongo tukung sid vosoi tu mangakakat ka vagu ponobon dit vosoi. It Tanakvagu dino kah minodopi kah sampai novuvui it inopuzan dau. Na otuvong po kah dot minsusuvab tungang noko kah om porimpihot no dit ongo nunu nopo dau om minuli no yosido tu rumosi ingkosupan dit ongo bahanan do tukung. Na irit ongo tukung dino kah kakali monobon dinot vosoi ka nosuvaban ih nga amu opongo-pongo monobon ka tu amu milod mintoron ka inot vosoi murulun. Na ka dit vozoon tukung ” Adih osuvab no ma diti oi, imatai no ditokou it riniba, nokouli no dati iri’ ka dit vozoon tukung. Na imatai nokah dau it inodopon dit tanakvagu nga suvot po kah nokouli noka inot tanakvagu.

Na it tanakvagu dino ka minuli no ka sid binatang it inintoronon dau. Antad sid sodu otimpan no ka dit ongo ulun dot banal noko navagatan do tambang inot tanakvagu. Na it molohing di tanakvagu dino kah nozom ogi humongkob tu songsodop amu nokouli bogima. Patahako no bogima dit tanakvagu it no ongoi dau sid vozoon tu ipabahagi dau sid sokoviai suvang songbinatang. Na bohogizo no kah bogima dit Vozoon it ongo tambang dino sid ongo ulun. Soira nimot di ongkol-ongkol ka om banal ko agazo o tambang nanu dinot tanakvagu, duato no dau it tanakvagu dino songgo kinonuvan inot tambang. ”Amu ku boroson songgo kinonuvan ku diti gamko yoku kondiri nga amu no sumori tu banal noko baiko buntung okupo muli ong amu minongo guna oku takal” kadi tanakvagu. Na yongkol-ongkol diti banal ko ulun mokimamaha ka banal ko mongutig banal dit tanakvagu sampai noboros dit tanakvagu. Na soira nailaan di ongkol-ongkol, suvab po di osopung poh kah pamanau no yosido sumusui di vazaan pinanahon dit ni tuduk di tanakvagu. Minsosodop po kah nokorikot no yosido sirid ponong do vosoi om insan minitalib kah it tambang mad tokono di ongkol-ongkol do bilok. Na giab-giabo no ka di ongkol-ongkol inot tambang sampai notuvangan. Piapui noko yongkol-ongkol tu monunu takanon dau. Minsosomok po kah tangalolong tionging noko dinot song bahanan o tukung migazo amu no. Na minongoduat noko inot vozoon tukung tomiabal do lingkut ka dau ”O Ambaza soira kaadapan nu ka dino” ka dit vozoon tukung. Na Yongkol-ongkol tu ulun dot aso takal inambat nobo dau it tukung dot ka dau ”Sukul ovuvu iti inopuzan ku, na kodop okuno bo diti” ka di ongkol-ongkol. Na norongou po kah dinot tukung kah tumulud no sid amu osodu tu minud ovuvu inot apui. Soira novuvu it inopuzan diongkol-ongkol ka rikoto noka dit ongo tukung yih ongkol-ongkol tu monosop dit raha om tonsi di ongkol-ongkol.

Na it molohing di ongkol-ongkol miinud tu humongkob banal ka to aso koulian di ongkol-ongkol, tangatadau noka nga amu ie kouli yongkol-ongkol na humongkob no banal it molohing di ongkol-ongkol. Na ihimo noko dit tanakvagu om ulun vokon sid pinogosuan dau om nokorikot po ko sid somok do vosoi nimot noko dioti yongkol-ongkol baiko tulang po kulit mampik-lampik. It tambang nanu di ongkol-ongkol nga navi ngoviai dit ongo tukung. Kibito no kah dau inot buntung di ongkol-ongkol muli. Soira nokorikot it buntung di ongkol-ongkol ka sid binatang antad noko kinuruduan dit molohing di ongkol-ongkol tu minatai no yongkol-ongkol. Ka di molohing dau "Inono ka anak tu minamanau ko ih dot kadan no sumori ka di aman nga sumori ko ih" ka dit molohing dau. Na minsosodop po ka nilobong no dioti it buntung diongkol-ongkol.